الجزء
الثالث من رواية ليلي والشيطان"مستوحاة من مريم المصرية "
الراهب
"الانبا زوسيما" :انا قاعد في خلوتي دي بقالي 53 سنة ، اكيد مكاني جنة
الفردوس ونعيمها ، أنا ماخرجتش من دير فلسطين ده المدة دي كلها ، أكيد
مافيش حد
زيي أنا أحسن من الناس دي كلها ، اللي بتصلي،وتعبد
ربنا بالإسم
فقط،ويتظاهروا بإنهم مقربين من ربنا بالذمة ده أسمه كلام
أنا بأفكر
في نفسي هه ، يمكن ألاقي نفسي أنا والرسل والقديسين بس
مع ربنا في
جنة الفردوس ، لكن باقي الرهبان والقسس ، دول شوية
مظاهر
وبس،ايههه يمكن أنا الراهب الوحيد اللي هايقبله المسيح في ملكوته
ايه هو أنا
قاعد أفكر في نفسي كتير كدة ليه .............."طرق علي الباب "
أقوم أشوف
مين .............................................."صوت فتح باب "
أهلا أبانا
سلام ونعمة ....أدخل أتفضل
الراهب
الثاني : لا أنا جاي في رسالة ورؤيا مستعجلة ليك
الراهب
" الانبا زوسيما " : رؤيا ورسالة ليا ..اهه "بسخرية" وعن
طريقك أنت ؟!
الراهب
الثاني : معلش يأبانا شخصي الضعيف ، لكن رب القوة هو اللي عاوزك تعرف حاجة
الراهب
"الابنا زوسيما " : طالما الله هو اللي عاوزني ...طيب مافيش مانع
..عموما جاي معاك
"صوت
أقدام تبعد" وفاصل موسيقي
الراهب سيما : أنا مش فاهم حاجة ...يعني أنت
يارب اللي طلعتني من ديري وجبتني هنا لدير قرب نهر الاردن ، واديني بأقضي الاربعين
يوم الصيام بالظبط في المكان اللي
قضيت فيه
صيامك ياسيدي المسيح ، في الصحراء دي المخيفة ، أظن أنا عرفت إن
مكانتي ، عظيمة
فوق باقي البشر ، وأدي الصيام خلاص هايخلص وزي عادة
الديرهنا لازم أرجع.....لا أرجع أيه مين ده
؟!مين اللي عدي بسرعة من جنبي ده
أرجع ...ده
شبح ..شيطان
المعلق mela: ياتري مين الراهب ده وايه حكايته ، وايه كمية الغرور اللي هو
فيها دي ؟
هو شايف نفسه علي الاخر ليه
كدة ، طب أستلقي وعدك بقي أهو ظهر ليك
لوسيفر نفسه ..ولا الشيطان ،
إتعامل بقي معاه ..هو اللي ظهرله ده شيطان
ولا إيه بالظبط ..تابعوا
معانا القصة للأخر وانتوا هاتعرفوا ..لكن ياريت نتفاعل
أكتر مع القناة صدقوني هاتلاقوا حكايات هاتعجبكم ، وزي ماقلت واعيد وأكرر
هيا
حكايات مؤلفة ..لكن لها أصل من الواقع ...روايات اتحكت لينا قبل كدة
وحكايات من
الواقع اللي بنعيشه بس في صيغة مثيرة ، ومشوقة وبالبلدي كدة بنضيف عليها
السسبنس بتاع القناة...فيا ريت اللي لسة ما أشتركش..يشترك في القناة،
وماتنساش
تظرف اللايك الجميل بتاعك ، وياريت نشير الفيديو علشان الكل يستفيد ، أه
صحيح
قبل ما أنسي لما أحب أفصل بين مشهد والتاني ها تلاقيني منزلك الموسيقي دي
"فاصل موسيقي " يالا بينا نكمل القصة ونشوف ايه حكاية الشيطان ده
ولا الشبح
وحكاية الراهب نفسه ...يالا
"فاصل موسيقي "
الراهب سيما : انت مين ...انت لوسيفر ...انت
جن ...الشيطان نفسه ...ايه ده هو انا خايف كدة
ليه
أنا الراهب سيما وبقوة المسيح
وبقوتي ها أتغلب عليك ..علشان كدة أنت خايف
وبتجري مني ...انت شبح صح ...ايه
ده هو احنا ها نلعب مع بعض بطل جري
وأقف عندك ....مش معني إني راجل
كبير إني مش ها أحصلك أيه ده أنت كمان
بتستخبي مني في الحفرة ....هههه أههه ياجبان
ليلي التائبة : ياراهب سيما أرجوك ماتقربش أكتر من كدة أنا
اه مش شيطان ولاجن ، أنا أمرأة
إنسانة خاطية زانية إتملكها
الشيطان، وعاش جواها ...أرجوك أوعي تقرب لإني
عريانة خالص مش لابسة أي هدووم
...ياريت ترمي لي عبايتك أستر بيها نفسي
الراهب سيما : إيه ده إنتي أنسية ...وكمان
عرفاني ..وعارفة إني راهب ...ايه ده صيتك مسمع
ياسيما ... عموما خدي ألقفي
العباية أهي وأطعي بقي ..علشان أشوفك .."بصوت
واطي " لما إنتي خاطية
وزانية أههه مكسوفة ليه إن حد يشوفك عريانة ...فوق يا
عم سيما أنت راهب ...والحاجات دي
أنت ميت عنها
ليلي التائبة : "صوت خروجها من الحفرة
وإقترابها منه "
أنت كاهن وعاوزاك تباركني ، وتصلي
عني
الراهب سيما : ايه ده وكمان عارفة اني كاهن
لأ ده إنتي وراكي قصة كبيرة لازم أعرفها وإزاي ت تقولي علي نفسك خاطية وزانية
...واللي واضح إنك بتكشفي الحاجات الخفية ..
وربنا أداكي قوة كبيرة ونعمة إنك عرفتيني وعرفتي كل حاجة عني ، ومش ها
أباركك
ولا اتكلم معاكي قبل ماتحكي لي حكايتك ، وإزاي عايشة في الصحرا دي ، وإزاي
جيتي
هنا ...والصحرا دي موحشة ..وأكيد فيها حيوانات مفترسة ، وبالليل بتعملي إيه
وسط
برية موحشة ..وبتاكلي وبتشربي ازاي ...مش خايفة من شياطين الإنس وشياطين
الجن
ليلي التائبة : أنا مصرية من إسكندرية ومن سن
12 سنة وسلمت جسدي للشيطان ..ومن فكري
الملوث الشرير ..أتوهمت أني عشت مع
جن بيغتصبني ، وبيدفعني للنجاسة والخطية
أهههههه ..أبويا راجل محترم وبيصلي وأمي ست طيبة .."بمرارة" أنا
وحشة ..
وحشة أوي . والشيطان فتح ليا أوسع الأبواب ..أبويا مات وأمي بعديه ...عشت
حياة
رزيلة وفجور ...وصل بيا الفجور إني أجي للقدس علشان أرتكب شرور كتيرة
وأستدرج
شباب كتير ، وفي عيد الصليب رحت كنيسة القيامة ، لقيت الناس كلها بتتدخل
عادي
وأنا لأ أتسمرت رجليا علي الباب ونزل حاجز شفاف علي الباب لي أنا وحدي وفي المكان اللي أنا فيه ..كل ما أقرب منه علشان أدخل يمنعي كأن إنسان ضخم مانع دخولي ..مش قادرة أدخل ...صرخت ...بكيت قدام صورة العدرا مريم واتكلمت معاها
عاوزاكي تتشفعي لي عند إبنك دخليني الكنيسة ..أنا عارفة إني إنسانة قذرة
..كلي نجاسة
ماأستاهلش إني أدخل هنا ..لكن أنتي تتشفعي لي إني أدخل أخد بركة الصليب
....أه عاوزة
أصلي ...عاوزة أسجد ...عاوزة أتوب ...وأنا..أنا أوعدك إني ها أسيب العالم
كله ....مش
ها أرجع للي أنا فيه تاني ...دخليني أرجوكي ..وقولي لي أعمل إيه
وفجأة
لقيت نفسي قادرة أقف والحاجز أو الانسان الضخم اللي مانعني أختفوا أو أختفي ..
مش عارفة ...المهم إني عارفة إني أدخل ...دخلت بسرعة سجدت وبكين عند الصليب
.
فضلت كتير أبكي وأصلي من الصبح لحد
نص النهار ...وشفت كأني في عيادة دكتور
وبينصحني وبصوت عالي مااعرفش مصدره قال لي
" صوت عميق" : عدي نهر الأردن
وعيشي هناك ..هاتتخلصي من شيطانك ومن كل شرورك
ليلي التائبة : حسيت براحة وسلام ما حستهوش قبل كدة قضيت الليل جنب كنيسة القيامة ، ولما
جه الصبح "صوت عصافير "
ياتري هاأعرف الطريق في بلد مش عارفة فيها حد .
أنا جعانة
رجل فلسطيني: خدي يابنتي خدي اللي أدهولك
ربنا
ليلي التائبة : أيه ده
رجل فلسطيني : تلات قطع فضة
ليلي التائبة : شكرا ليك ...لو سمحت أنا
عاوزة أشتري 3 أرغفة عيش وياريت تقولي طريق نهر
الاردن من فين
عديت باب المدينة وصلت لكنيسة يوحنا المعمدان قعدت أبكي وغسلت وشي وبعدين
دخلت الكنيسة وأعترفت بكل جرايمي ونجاستي واتناولت وعديت من نهر الاردن
ومشيت في الصحرا وبشفاعة العدرا قدرت أعيش فيها وأتحمل كل الصعب
المعلق : بس خلاص لحد هنا وينتهي الجزء
الثالث ..ولو القصة عاجباكوا ياريت تكتبوا لو عاوزين جزء رابع هاتحكي عن محارابات
الشيطان لها ..وطبعا النهاية الطبيعية لأي إنسان هي الموت وهانحاول نقولكم موتها
كان إزاي ....طبعا القصة مؤلفة لكن ليها أصل وهي عن قصة مريم المصرية وطبعا إحنا مغيرين الأسماء لاننا مش مصدر كنسي ويالاسلام ونتقابل في الجزء الرابع
انتظروا أيضا :الجزء الرابع
من رواية ليلي والشيطان"مستوحاة من مريم المصرية "